«Բարեսրտության մտավարժանք» կոչվող տեխնիկան կարող է նվազեցնել զայրույթի և տագնապի զգացումը, բարենպաստ ազդեցություն ունենալ ամուսնական հարաբերությունների վրա և բարելավել քրոնիկական ցավի ապրումը։ Այս տեխնիկան բարենպաստ է ազդում նաև այն անձանց վրա, ովքեր տևական ժամանակ զբաղվում են ընտանիքի անդամներից մեկի խնամքով։
«Բարեսրտության մտավարժանքի» ազդեցությունն ապացուցվել է գիտական հետազոտություններով։ Գիտնականների համաձայն՝ մտավարժանքի այս տարատեսակը կարող է նվազեցնել ինքնաքննադատությունը, ինքնավնասման փորձերը (նման հակվածություն ունեցող անձնանց մոտ), բարելավել կյանքից ընդհանուր բավարարվածությունը և վերականգնվողականությունը և նույնիսկ դանդաղեցնել բջիջների ծերացման ընթացքը։
Մեր «Ինչ է մեդիտացիան և ինչպես այն կատարել» հոդվածում արդեն խոսել ենք այն մասին, թե ինչ են մտավարժանքներն առհասարակ։ Այդ հոդվածը կարող եք կարդալ՝ սեղմելով այստեղ։ Իսկ այժմ եկեք տեսնենք, թե ինչպես է պետք կատարել մտավարժանքի հենց այս տեսակը։
Ինչպես կատարել
Բարեսրտության մտավարժանքը կատարելու համար բավական է տրամադրել ընդամենը մի քանի րոպե։ Պարզապես առանձնացեք որևէ լուռ վայրում, ուր ձեզ չեն խանգարի կողմնակի ձայներն ու շարժը։ Զբաղեցրեք հարմարավետ դիրք (պառկած կամ նստած), փակեք ձեր աչքերը, թուլացրեք մկաններ և մի քանի անգամ խորը շունչ քաշեք։
Պատկերացրեք, թե գտնվում եք ֆիզիկական և մտավոր լիովին առողջ վիճակում, զգում եք թեթևություն և ներքին հանդարտություն։ Պատկերացրեք, որ ընդունում եք ձեր անձն այնպիսին, ինչպիսին կա՝ սիրով և հոգատարությամբ եք լցված ձեր հանդեպ։ Երևակայելիս՝ կենտրոնացեք ձեր ապրումների վրա։ Պատկերացրեք, թե ինչպես եք արտաշնչելիս դուրս հանում ցանկացած լարվածություն, իսկ շնչելիս՝ ձեր մեջ հավաքում սերն ու խաղաղությունը։
Մտովի մի քանի բարեմաղթանք հղեք ձեզ։ Օրինակ՝ «թող ես երջանիկ լինեմ», «թող ես ապահովության մեջ լինեմ», «թող ես առողջ լինեմ», «թող ապրեմ խաղաղ երկնքի տակ»։ Աշխատեք ընտրել համընդհանուր կամ համամարդկային բարիքներ, առանց որոնց դժվար կլիներ ապրելը։
Այնուհետև պատկերացրեք ձեր անմիջական ընտանիքի անդամներին և մի քանի բարեմաղթանք էլ ուղղեք նրանց հասցեին։ Լավ կլիներ, որ կրկնեիք նույն բարեմաղթանքները, որոնք ձեր հասցեին էիք հղել։
Շարունակեք մտավարժանքը՝ ուշադրությունը տեղափոխելով ավելի հեռու ծանոթների և մտերիմների ուղղությամբ։ Կրկնեք նույն բարեմաղթանքները նաև նրանց համար։ Պարզապես «թող նրանք առողջ լինեն», «թող ապրեն խաղաղ երկնքի տակ» և այլն։
Վերջում հղեք ձեր մաղթանքները ողջ մարդկությանը՝ անկեղծորեն ցանկանալով, որ բոլորն ապրեն առանց տառապանքի և հնարավորինս երջանիկ։
Երբ զգաք, որ պատրաստ եք՝ դանդաղ բաց արեք ձեր աչքերը և անցեք բնականոն կյանքին։ Մի մոռացեք պարբերաբար վերադառնալ այս մտավարժանքին։ Բոլոր մարզումների պես, «բարեսրտության մարզումը» նույնպես պահանջում է ճիգեր գործադրել և ցուցաբերել հետևողականություն։
Ինչ խոսքեր ընտրել
Ինչպես արդեն ասացինք, բարեսրտության մտավարժանքի ընթացքում կարելի է մտովի կրկնել ցանկացած բարեմաղթանքներ, որոնք հավասարապես դրական են ընդունվում յուրաքանչյուրի կողմից։ Ձեր աշխատանքն ավելի հեշտացնելու համար, վերը թվարկած մի քանի օրինակից բացի, եկեք թվարկենք ևս մի քանի արտահայտություններ, որոնք կարող եք կիրառել մտավարժանքի ընթացքում։ Պարտադիր չէ ամեն անգամ կրկնել միևնույն արտահայտությունները։ Պարզապես ծանոթացեք այս ցուցակին և մտավարժանքի ընթացքում ընտրեք այն բառերը, որոնք այդ պահին ձեր մտքին կգան։
- Թող ես հեռու լինեմ փորձանքներից,
- Թող ես ազատ լինեմ տառապանքից,
- Թող ես իմ մասին հոգ տանելու հնարավորություն ունենամ,
- Թող ես շրջապատված լինեմ սիրով և հոգատարությամբ,
- Թող ես ապահովության և անվտանգության մեջ լինեմ,
- Թող ես ազատ լինեմ վախերից և տագնապներից,
- Թող ես հույսով ու հավատով լի լինեմ,
- Թող ես ներդաշնակության մեջ լինեմ աշխարհի հետ,
- Թող ես սիրեմ ինձ այնպիսին, ինչպիսին կամ,
- Թող իմ կյանքը լի լինի իմաստով և ուրախությամբ։
Կիրառել ներելու համար
Բարեսրտության մտավարժանքն է՛լ ավելի մեծ օգտուտ կարող է տալ, երբ դրա ընթացքում, ի թիվս այլոց, անդրադառնաք նաև ձեր կյանքում ներկա «բարդ» մարդկանց, ում հետ հարաբերությունները բավարար հարթ չեն կամ ում հանդեպ վիրավորանք և զայրույթ եք զգում։ Այդպիսով դուք կարող եք առնվազն ձեր մտքում ներել նրանց, ազատվել զայրույթից, վիրավորանքից և դրանց ուղեկցող տևական մտատանջանքներից ու մտակռիվներից։
Սեփական սխալներն ու բացթողումները ներելու և սեփական անձի հանդեպ առավել կարեկից լինելու մասին էլ խոսել ենք մեր «Ինչ է ինքնակարեկցանքը և ինչպես կարող ենք այն զարգացնել» հոդվածում, որը կարող եք կարդալ՝ սեղմելով այստեղ։
